ဇွန်လ ၂၇ ရက်နေ့တွင် “အားကစားမှတစ်ဆင့် ချိတ်ဆက်၍ အနာဂတ်ကို မျှဝေခြင်း — တရုတ်–အာဆီယံ အားကစားဖလှယ်မှုနှင့် ပူးပေါင်းဆောင်ရွက်မှုအတွက် လမ်းကြောင်းသစ်များ” ခေါင်းစဉ်ဖြင့် ပညာရပ်ဆိုင်ရာ ဆွေးနွေးပွဲကို ကွမ်ရှီးတက္ကသိုလ် (GXU) တွင် ကျင်းပခဲ့သည်။ တက္ကသိုလ်ပါတီကော်မတီ အမြဲတမ်းကော်မတီဝင်နှင့် ဒုတိယဥက္ကဋ္ဌ Liu Xiang တက်ရောက်ခဲ့ပြီး ဖွင့်ပွဲအခမ်းအနားတွင် အမှာစကား ပြောကြားခဲ့သည်။

    Liu Xiang က တက်ရောက်လာကြသည့် ဧည့်သည်တော်များကို နွေးထွေးစွာ ကြိုဆိုခဲ့ပြီး ကွမ်ရှီးတက္ကသိုလ် (GXU) ၏ ဖွံ့ဖြိုးတိုးတက်မှုအခြေအနေ ကို မိတ်ဆက်ရှင်းလင်းခဲ့သည်။ ၎င်းက ကာယပညာကျောင်း (School of Physical Education) သည် အာဆီယံဒေသနှင့် ထိစပ်နေသည့် ကွမ်ရှီး၏ ပထဝီဝင်အားသာချက်ကို အသုံးချကာ တရုတ်–အာဆီယံ အားကစားနှင့် ယဉ်ကျေးမှုဖလှယ်ရေး ကို အဓိကထားသည့် နိုင်ငံတကာဖလှယ်ရေး လက်တွေ့လုပ်ငန်းများကို ဆက်လက်မြှင့်တင်ဆောင်ရွက်ခဲ့ပြီး၊ သိပ္ပံသုတေသနရလဒ်များစွာနှင့် ထင်ရှားသည့် အားကစားပြိုင်ပွဲအောင်မြင်မှုများကို ရရှိခဲ့ကြောင်း ပြောကြားခဲ့သည်

    ၎င်းက ယခုဆွေးနွေးပွဲ၏ ရည်ရွယ်ချက်မှာ အားကစားယဉ်ကျေးမှု၊ ပညာရေး၊ အားကစားစက်မှုလုပ်ငန်း စသည့် နယ်ပယ်များတွင် တရုတ်နှင့် အာဆီယံနိုင်ငံများအကြား ပူးပေါင်းဆောင်ရွက်နိုင်မည့် လမ်းကြောင်းများကို နက်ရှိုင်းစွာ ဆွေးနွေးရှာဖွေရန် ဖြစ်ကြောင်း ပြောကြားခဲ့သည်။ ယင်းသည် နိုင်ငံတော်၏ “Belt and Road” အစီအစဉ် ကို တုံ့ပြန်အကောင်အထည်ဖော်သည့် လက်တွေ့လုပ်ဆောင်ချက်တစ်ရပ်ဖြစ်သကဲ့သို့၊ ပိုမိုနီးကပ်ခိုင်မာသည့် တရုတ်–အာဆီယံ အနာဂတ်အတူတကွမျှဝေသည့် အသိုက်အဝန်း တည်ဆောက်ရေးအတွက် ဝန်ဆောင်မှုပေးခြင်းနှင့် ဒေသတွင်းအားကစား၏ အရည်အသွေးမြင့် ဖွံ့ဖြိုးတိုးတက်မှုကို မြှင့်တင်ရန် လိုအပ်ချက်တစ်ရပ်လည်း ဖြစ်ကြောင်း ၎င်းက အလေးပေးပြောကြားခဲ့သည်။

    Keynote speech အစီအစဉ်တွင် Tsinghua University ၏ ကာယပညာဌာနမှ ပါမောက္ခ Liu Bo၊ Beijing Sport University မှ ပါမောက္ခ Zhang Xiaoyi နှင့် East China Normal University မှ ပါမောက္ခ Liu Guihai တို့က သက်ဆိုင်ရာ ခေါင်းစဉ်များဖြင့် အထူးအစီရင်ခံစာများကို အသီးသီး တင်ပြခဲ့ကြသည်။

ပါမောက္ခ Liu Bo က “Belt and Road Initiative ကို မြှင့်တင်ရာတွင် အားကစား၏ သမိုင်းဝင်အောင်မြင်မှုများနှင့် အနာဂတ်ဖွံ့ဖြိုးတိုးတက်မှု”၊ ပါမောက္ခ Zhang Xiaoyi က “ပထဝီနိုင်ငံရေးရှုထောင့်မှ တရုတ်–အာဆီယံ အားကစားဖလှယ်မှုနှင့် ပူးပေါင်းဆောင်ရွက်မှု” နှင့် ပါမောက္ခ Liu Guihai က “ရာစုနှစ်တစ်ကြိမ် ဖြစ်ပေါ်သည့် အပြောင်းအလဲများ အရှိန်မြှင့်တိုးတက်နေချိန်တွင် အားကစားမှတစ်ဆင့် တရုတ်–အာဆီယံ အနာဂတ်အတူတကွမျှဝေသည့် အသိုက်အဝန်းကို မြှင့်တင်ခြင်း—နေရာသစ်များ၊ လမ်းကြောင်းသစ်များနှင့် မောင်းနှင်အားသစ်များ” ဟူသော ခေါင်းစဉ်များဖြင့် အသီးသီး တင်ပြခဲ့ကြသည်။

    ဝိုင်းစားပွဲဆွေးနွေးပွဲ (Roundtable Forum) အတွင်း Beijing Sport University မှ ပါမောက္ခ Zhang Aihong၊ Beibu Gulf University မှ ပါမောက္ခ Tang Minghuan နှင့် ကွမ်ရှီးတက္ကသိုလ် (GXU) မှ လက်ထောက်ပါမောက္ခ Yu Liping တို့က “နှလုံးသားများကို မည်သို့ ချိတ်ဆက်နိုင်မည်နည်း — တရုတ်–အာဆီယံ အားကစားဖလှယ်မှု၏ သမိုင်းဝင်အမွေအနှစ်၊ ယဉ်ကျေးမှုမျှဝေမှုနှင့် လက်တွေ့အကောင်အထည်ဖော်ရေး လမ်းကြောင်းများ” ဟူသည့် ခေါင်းစဉ်ဖြင့် နက်ရှိုင်းစွာ ဆွေးနွေးခဲ့ကြသည်။

    ဆွေးနွေးမှုမှတစ်ဆင့် သမိုင်းဝင်မူလအမြစ်များ မျှဝေထားမှုနှင့် အပြန်အလှန်ယဉ်ကျေးမှုတန်ဖိုးထားမှု၊ ရိုးရာယဉ်ကျေးမှုသင်္ကေတများကို ခေတ်နှင့်အညီ ပြန်လည်ဖော်ဆောင်အသုံးချမှု၊ လက်တွေ့လုပ်ဆောင်နိုင်မည့် နည်းလမ်းများကို မျိုးစုံချဲ့ထွင်ဖော်ဆောင်မှု စသည့် ကဏ္ဍများတွင် သဘောတူညီမှုများ ရရှိခဲ့ကြသည်။

    ဆွေးနွေးပွဲတွင် “တရုတ်–အာဆီယံ အားကစားဖလှယ်မှုနှင့် ပူးပေါင်းဆောင်ရွက်မှု” နှင့် “တရုတ်–အာဆီယံ ရိုးရာအားကစား အမွေအနှစ်ထိန်းသိမ်းခြင်းနှင့် ဖွံ့ဖြိုးတိုးတက်ခြင်း” ဟူသည့် ခေါင်းစဉ်များဖြင့် အထူးဆွေးနွေးပွဲ ၂ ခု ကိုလည်း ကျင်းပခဲ့သည်။

ပညာရှင်များ၊ သုတေသီများနှင့် သက်ဆိုင်ရာပညာရပ်ခေါင်းဆောင်များက မူဝါဒနှင့် ယန္တရားများ၊ အားကစားပြိုင်ပွဲများ ပူးပေါင်းကျင်းပရေး၊ အားကစားနှင့် စက်မှုလုပ်ငန်း ပေါင်းစပ်ဖွံ့ဖြိုးရေး စသည့် ရှုထောင့်များမှ အကြောင်းအရာများကို ဘက်ပေါင်းစုံမှ ခွဲခြမ်းစိတ်ဖြာ ဆွေးနွေးခဲ့ကြသည်။

    ထို့အပြင် ရိုးရာအားကစားများ၏ အမွေအနှစ်ထိန်းသိမ်းရေး၊ ဆန်းသစ်တီထွင်ရေးနှင့် နိုင်ငံတကာသို့ ဖြန့်ဝေမြှင့်တင်ရေး ကဲ့သို့သော လက်ရှိစိတ်ဝင်စားမှုမြင့်မားသည့် သုတေသနခေါင်းစဉ်များကို အဓိကထားဆွေးနွေးခဲ့ကြပြီး၊ မိမိတို့၏ နောက်ဆုံးပေါ် သုတေသနတိုးတက်မှုများနှင့် ရလဒ်များ ကိုလည်း အပြန်အလှန် မျှဝေခဲ့ကြသည်။

    ယခုဆွေးနွေးပွဲကို ကွမ်ရှီးတက္ကသိုလ် ကာယပညာကျောင်း (School of Physical Education) နှင့် တရုတ်–အာဆီယံ သုတေသနအင်စတီကျု (China–ASEAN Research Institute) တို့က ပူးတွဲကျင်းပခဲ့ခြင်းဖြစ်သည်။

    ဆွေးနွေးပွဲသို့ Tsinghua University၊ Beijing Sport University၊ East China Normal University နှင့် အခြားတက္ကသိုလ်များ၊ သုတေသနအဖွဲ့အစည်းများမှ တာဝန်ရှိသူများနှင့် ပညာရှင်များအပြင်၊ ကွမ်ရှီးတက္ကသိုလ် ကာယပညာကျောင်းမှ အဓိကတာဝန်ရှိသူများ၊ သက်ဆိုင်ရာပညာရပ်ခေါင်းဆောင်များ၊ ဆရာ၊ ဆရာမများနှင့် ကျောင်းသား၊ ကျောင်းသူ ကိုယ်စားလှယ်များ ပါဝင်ပြီး လူဦးရေ ၁၀၀ ကျော် တက်ရောက်ခဲ့ကြသည်။